Home > ຂ່າວທົ່ວໄປ> ສານຕັດສິນ 7 ຄົນ ຈຳຄຸກຕະຫຼອດ ຊີວິດຍ້ອນຄະດີ ຢາບ້າ
Updated: 07/03/2014
Viewed : 1019
ຢາເສບຕິດເປັນພິດ, ເປັນໄພຕໍ່ສັງ ຄົມ, ເປັນສິ່ງກົດໜ່ວງຕໍ່ການພັດທະນາ ເສດຖະກິດ-ສັງຄົມ, ກາຍເປັນໄພຄຸກ ຄາມຕໍ່ຄວາມໝັ້ນຄົງຂອງຊາດ...

 

ສານຕັດສິນ 7 ຄົນ ຈຳຄຸກຕະຫຼອດ ຊີວິດຍ້ອນຄະດີ ຢາບ້າ 

  ຢາເສບຕິດເປັນພິດ, ເປັນໄພຕໍ່ສັງ ຄົມ, ເປັນສິ່ງກົດໜ່ວງຕໍ່ການພັດທະນາເສດຖະກິດ-ສັງຄົມ, ກາຍເປັນໄພຄຸກ ຄາມຕໍ່ຄວາມໝັ້ນຄົງຂອງຊາດ, ສ້າງຄວາມຫາຍະນະມາສູ່ຄອບຄົວ-ສັງຄົມ ແລະ ມາສູ່ຕົນເອງດັ່ງ 7 ຄົນທີ່ທາງ ສານແຂວງຫຼວງພະບາງ ໄດ້ຕັດສິນຈໍາຄຸກຕະຫຼອດຊີວິດຍ້ອນຄະດີຢາບ້າ.

   ທ່ານ ສາຍຄໍາ ສີທໍລັກ ຮອງຫົວໜ້າອົງການໄອຍະການ ແຂວງຫຼວງພະບາງໄດ້ໃຫ້ຮູ້ໃນຫວ່າງບໍ່ດົນນີ້ວ່າ: ຜ່ານການເຄື່ອນໄຫວປະຕິບັດວຽກງານຂອງອົງການໄອຍະການສານປະຊາຊົນແຂວງຮ່ວມກັບພາກສ່ວນທີ່ກ່ຽວຂ້ອງໃນໜຶ່ງປີຜ່ານມານັບ ແຕ່ປີ 2013 ຫາ 2014 ນີ້ ທາງເຈົ້າໜ້າທີ່ແຂວງຫຼວງພະບາງສາມາດມ້າງລາຍຄະດີຢາເສບຕິດໄດ້ທັງໝົດ 104 ເລື່ອງ, ມີຜູ້ຖືກຫາທັງໝົດ 177 ຄົນ, ຍິງ 28 ຄົນ, ໄດ້ສັ່ງຟ້ອງຂຶ້ນສານ ແລະ ມີຄຳຕັດສິນຂອງສານທີ່ໃຊ້ໄດ້ຢ່າງເດັດຂາດແລ້ວຈໍານວນ 36 ເລື່ອງ, ມີນັກໂທດທັງໝົດ 49 ຄົນ, ຍິງ 7 ຄົນ.

   ໃນນັ້ນ ສານໄດ້ຕັດສິນຈໍາຄຸກຕະຫຼອດຊີວິດ 7 ຄົນ ມີຂອງກາງຢາບ້າຈໍາ ນວນ 4,92 ກິໂລກຣາມ ລວມ 40.920 ເມັດ, ຢາຝິ່ນ ຈໍານວນ 37,6 ກິໂລກຣາມ, ກັນຊາແຫ້ງ 41,2 ກຣາມ, ຝຸ່ນຂາວເພື່ອປະສົມຢາເສບຕິດຈໍານວນ 1,2 ກິໂລ ກຣາມ, ເຮໂຣອິນ 4,8 ກຣາມ,ອຸປະກອນການເສບແລະສິ່ງຫຸ້ມຫໍ່ຢາເສບຕິດອີກຈໍານວນໜຶ່ງແລະໄດ້ຈູດທໍາລາຍໄປເນື່ອງໃນໂອກາດການສະຫຼອງວັນສາກົນ ຕ້ານຢາເສບຕິດຄົບຮອບ 27 ປີ ໃນ ວັນທີ 26 ມິຖຸນາ 2014 ຜ່ານມານີ້.

  ພ້ອມກັນນີ້ ທ່ານ ສາຍຄໍາ ຍັງໄດ້ ຮຽກຮ້ອງໃຫ້ທຸກໜ່ວຍງານທີ່ກ່ຽວ ຂ້ອງລວມເຖິງພໍ່ແມ່ປະຊາຊົນ ໃນຂອບ ເຂດທົ່ວປະເທດ ໂດຍສະເພາະແມ່ນແຂວງຫຼວງພະບາງຈົ່ງພ້ອມກັນຍົກສູງສະຕິລະວັງຕົວຕໍ່ທຸກຊ່ອງທາງທີ່ອາດພາໃຫ້ທ່ານເຂົ້າໄປຂ້ອງກ່ຽວກັບຢາບ້າເຫຼົ່າ ນັ້ນເພາະຜົນຮ້າຍຂອງຢາບ້າມັນອັນຕະລາຍທີ່ສຸດຕໍ່ມວນມະນຸດ, ລິດຢາບ້າສາມາດເອົາຄວາມຕາຍໃຫ້ກັບທຸກຄົນໄດ້. ສະນັ້ນ ໃຫ້ທຸກຄົນຈົ່ງຫ່າງໄກຈາກຢາເສບຕິດທຸກປະເພດແມ່ນດີທີ່ສຸດເພື່ອເປັນພົນລະເມືອງທີ່ດີຂອງສັງຄົມປະກອບສ່ວນເຂົ້າໃນພາລະກິດ

ປົກປັກຮັກສາ ແລະ ສ້າງສາພັດທະນາປະເທດ ຊາດໃຫ້ຈະເລີນຮຸ່ງເຮືອງ ແລະ ປັດສະຈາກສິ່ງເສບຕິດ.

 

Related items