Home > ຂ່າວພາຍໃນ> 6 ເດືອນຕົ້ນປີ ເສຍຊີວິດ 90 ກວ່າ ຄົນ ຍ້ອນອຸບັດເຫດ
Updated: 07/03/2014
Viewed : 489
ທ່ານ ພັນ​ຕີ ບຸນ​ມາກ ສູນ​ດາ​ໄລ ຮອງ ຫົວ­ໜ້າ​ພະ​ແນກ​ຈະ­ລາ­ຈອນ ນະ­ຄອນ ຫຼວງ​ວຽງ​ຈັນ ລາຍ​ງານ​ວ່າ: ອຸ­ບັດ­ເຫດ ແມ່ນ​ເກີດ​ຂຶ້ນ​ໄດ້​ທຸກ​ເວ­ລາ ທຸກ​ວັນ ທຸກ ສະ­ຖານ­ທີ່​ຫຼາຍ​ກໍ­ລະ­ນີ...

 

 6 ເດືອນຕົ້ນປີ ເສຍຊີວິດ 90 ກວ່າ ຄົນ ຍ້ອນອຸບັດເຫດ

  

   ອຸບັດເຫດ​ເປັນ​ສິ່ງ​ທີ່​ທຸກ​ຄົນ​ຫຼີກ ເວັ້ນ​ທີ່​ສຸດ ແຕ່​ກໍ​ປັດ​ສະ​ຈາກ​ບໍ່​ໄດ້​ເນື່ອງ ຈາກ​ເປັນ​ເຫດ​ສຸດ​ວິໄສ ແລະ ໂດຍ​ສ່ວນໃຫຍ່​ອຸບັດເຫດ​ເກີດ ຂຶ້ນ​ແຕ່​ລະ​ຄັ້ງ​ຍ້ອນຜູ້​ຂັບ​ຂີ່​ທັງຫຼາຍ​ຍັງ​ຖື​ເບົາ​ຕໍ່​ກົດ​ລະບຽບຈະລາຈອນ​ຕາມ​ຂ່າວ​ຫຼ້າ​ສຸດ 6 ເດືອນ ຕົ້ນ​ປີ 2014 ທີ່​ນະຄອນຫຼວງ​ວຽງ​ຈັນ ມີ​ຜູ້​ເສຍ​ຊີວິດ 90 ກວ່າ​ຄົນ ແລະ ສ້າງ ມູນ​ຄ່າ​ຄວາມ​ເສຍ​ຫາຍຫຼາຍ​ກວ່າ 7 ຕື້​ກີບ.

   ທ່ານ ພັນ​ຕີ ບຸນ​ມາກ ສູນ​ດາ​ໄລ ຮອງຫົວໜ້າ​ພະ​ແນກ​ຈະລາຈອນ ນະຄອນຫຼວງ​ວຽງ​ຈັນລາຍ​ງານ​ວ່າ: ອຸບັດເຫດແມ່ນ​ເກີດ​ຂຶ້ນ​ໄດ້​ທຸກ​ເວລາທຸກ​ວັນທຸກສະຖານທີ່​ຫຼາຍ​ກໍລະນີໄດ້​ສ້າງ​ຄວາມເສຍ​ຫາຍ​ແກ່​ຊັບ​ສິນລວມ​ທັງ​ຊີວິດ​ມະນຸດ​ນັບ​ຫຼາຍ​ຄົນໂດຍ​ສະເພາະ​ໃນ​ນະຄອນ​ຫຼວງວຽງ​ຈັນເຫັນ​ໄດ້​ໃນ​ໄລຍະ 6 ເດືອນ​ຕົ້ນ​ປີ 2014 ມີ​ຕົວ​ເລກ​ອຸບັດເຫດເກີດ​ຂຶ້ນ​ທັງ​ໝົດ 788 ກໍລະນີ ໃນ​ນັ້ນພາຫະນະ​ເປ່​ເພ​ສົມຄວນ​ມີ 893 ຄັນ, ເລັກ​ນ້ອຍ 650 ຄັນ, ໃຊ້​ການ​ບໍ່​ໄດ້ 15 ຄັນ, ມີ​ຜູ້​ໄດ້​ຮັບ​ບາດເຈັບ​ເລັກ​ນ້ອຍ 453 ຄົນ, ສົມຄວນ 522 ຄົນ, ເຈັບ​ສາຫັດ 155 ແລະ ເສຍ​ຊີວິດ 91 ຄົນ ເມືອງ​ທີ່ເກີດ​ອຸບັດເຫດ​ຫຼາຍ​ທີ່​ສຸດ​ແມ່ນ​ເມືອງ​ໄຊທານີ, ສີ​ສັດຕະ​ນາກ, ຈັນທະ​ບູ​ລີ ສາເຫດຫຼັກ​ຂອງ​ການ​ເກີດ​ອຸບັດເຫດ​ສ່ວນ​ໃຫຍ່ຍັງ​ແມ່ນ​ມາ​ຈາກ​ການ​ດື່ມ​ເຫຼົ້າ​ເມົາ​ແລ້ວ ຂັບ​ຂີ່​ຍານພາຫະນະ​ດ້ວຍ​ຄວາມ​ໄວ​ສູງ, ອຸບັດເຫດ​ສະເພາະ 6 ເດືອນ​ຕົ້ນ​ປີ 2014 ຜ່ານ​ມາ​ນີ້ໄດ້​ສ້າງ​ຄວາມ​ເສຍ​ຫາຍ​ສູງ ເຖິງ 7,4 ຕື້​ກວ່າ​ກີບ.

   ທ່ານ ພັນ​ຕີ ບຸນ​ມາກ ສູນ​ດາ​ໄລ ກ່າວຕື່ມ​ວ່າ: ເສັ້ນທາງ​ໃນ​ນະຄອນຫຼວງເປັນເສັ້ນທາງ​ປູຢາງທາງ​ຊື່ຜູ້​ຂັບ​ຂີ່​ລົດ​ບໍ່​ລະມັດ​ລະວັງຂັບ​ຂີ່ດ້ວຍ​ຄວາມ​ປະໝາດອັນ​ເປັນ​ສາເຫດ​ເຮັດ​ໃຫ້​ເກີດ​ອຸບັດເຫດ ແລະ ສ່ວນ​ໃຫຍ່​ພາຫະນະ​ທີ່​ມັກ​ເກີດ​ອຸບັດ​ເຫດ​ນັ້ນ​ແມ່ນ: ລົດຈັກ​ຕຳ​ກັນລົດຈັກ​ຕຳ​ລົດ​ໃຫຍ່ສ່ວນ​ລັກສະນະ​ການ​ຕຳນັ້ນ​ແມ່ນ​ຕຳ​ທາງ​ຂ້າງ, ຕຳ​ທາງ​ໜ້າ ແລະ ຕຳ​ດ້ວຍ​ຮູບ​ແບບ​ອື່ນໆ​ເຮັດ​ໃຫ້​ສູນເສຍ​ທັງ​ຊີວິດທັງ​ຊັບ​ສິນ​ເປັນ​ຈຳນວນຫຼວງຫຼາຍ.

   ຢ່າງໃດ​ກໍ​ດີບັນຫາ​ການ​ຂັບ​ຂີ່​ລົດຍານພາຫະນະ​ທຸກ​ປະເພດ​ທຸກ​ຄົນ​ຕ້ອງເປັນ​ເຈົ້າ​ການ, ຕັ້ງ​ສະຕິ​ກ່ອນ​ສະ​ຕາດເຄື່ອງ​ຈັກ, ເວລາ​ດື່ມ​ສິ່ງມຶນເມົາ​ບໍ່​ຄວນຂັບ​ຂີ່​ລົດ​ແມ່ນ​ດີ​ທີ່​ສຸດທັງ​ນີ້ກໍ​ເພື່ອ​ຄວາມປອດ​ໄພ​ໃຫ້​ກັບ​ຕົນ​ເອງ​ກໍ​ຄື​ຄວາມ​ປອດໄພ​ຂອງ​ຄົນ​ອື່ນ​ທີ່​ຈະ​ເກີດ​ອຸບັດເຫດ​ອັນ​ທີ່ຈະນຳ​ມາ​ຊຶ່ງ​ຄວາມ​ສູນ​ເສຍ​ທາງ​ດ້ານຊັບ​ສິນ ແລະ ຊີວິດ ຫຼື ຮ່າງກາຍ.

Related items