Home > ຂ່າວພາຍໃນ> ລາວອາດມີກົດໜາຍ ການກວດສອບເອກະລາດ
Updated: 03/07/2014
Viewed : 812
ກອງ​ປະຊຸມ​ສະ​ໄໝສາມັນ​​ເທື່ອທີ 7 ຂອງ​ສະພາ​ແຫ່ງ​ຊາດ​ຊຸດ​ທີ VII ຈະ​ເປ​ີດຂຶ້ນ​ຢ່າງ​ເປັ​ນທາງ​ການ​ໃນ​ຕົ້ນ​ອາທິດໜ້າ ​ໂດຍ​ກອງ​ປະຊຸມ​ເທື່ອ​ນີ້​ຈະ​ພິຈາລະນາ​ຮ່າງ​ກົດໝາຍ 5 ສະບັບ ​ເປັນ​ກົດໝາຍ​ໃໝ່ 2 ສະບັບ, ໜຶ່ງ​ໃນ​ນັ້ນ ມີ​ກົດໝາຍ​ວ່າ​ດ້ວຍ​ການ​ກວດສອບ​ເອກະລາດ.

 ລາວອາດມີກົດໜາຍ ການກວດສອບເອກະລາດ

   ກອງ​ປະຊຸມ​ສະ​ໄໝສາມັນ​​ເທື່ອທີ 7 ຂອງ​ສະພາ​ແຫ່ງ​ຊາດ​ຊຸດ​ທີ VII ຈະ​ເປ​ີດຂຶ້ນ​ຢ່າງ​ເປັ​ນທາງ​ການ​ໃນ​ຕົ້ນ​ອາທິດໜ້າ ​ໂດຍ​ກອງ​ປະຊຸມ​ເທື່ອ​ນີ້​ຈະ​ພິຈາລະນາ​ຮ່າງ​ກົດໝາຍ 5 ສະບັບ ​ເປັນ​ກົດໝາຍ​ໃໝ່ 2 ສະບັບ, ໜຶ່ງ​ໃນ​ນັ້ນ ມີ​ກົດໝາຍ​ວ່າ​ດ້ວຍ​ການ​ກວດສອບ​ເອກະລາດ.

   ທ່ານ ອຸ່ນ​ແກ້ວ ວຸທິລາດ ກຳມະການ​ຄະນະ​ປະຈຳ​ສະພາ​ ຫົວໜ້າ​ຫ້ອງການ​ສະ​ພາ​ແຫ່ງ​ຊາດ ​ໄດ້​ຖະ​ແຫຼ​ງຕໍ່​ສື່​ມວນ​ຊົນ ​ເມື່ອ​ວັນ​ທີ 2 ກໍລະກົດ​ນີ້​ວ່າ: ສະພາ​ແຫ່ງ​ຊາດ​ຈະ​​ໄດ້​ດຳ​ເນີນ​ກອງ​ປະຊຸມ​ສະ​ໄໝ​ສາມັນ​ເທື່ອ​ທີ 7 ຂອງ​ສະພາ​ແຫ່ງ​ຊາດ​ຊຸດ​ທີ VII ນັບ​ແຕ່​ວັນ​ທີ 5 ​ເຖິງ​ວັນ​ທີ 25 ກໍລະ​ກົດ 2014 ​ໂດຍ​ຕະຫຼອດ​ເວລາ 15 ວັນ ກອງ​ປະຊຸມ​ຈະ​ໄດ້​ຮັບ​ຟັງ​ການຈັດ​ຕັ້ງ​ປະຕິບັດ​ແຜນ​ພັດທະນາ​ເສດຖະກິດ-ສັງຄົມ, ​ແຜນ​ງົບປະມານ​ແຫ່ງ​ລັດ ສົກ​ປີ 2013-2014 ​ແລະ ທິດ​ທາງ​ສົກ​ປີ 2014-2015 ​ໃນ​ນັ້ນ ມີ​ບົດ​ລາຍ​ງານ​ຂອງ​ກະ​ຊວງ​ແຜນການ ​ແລະ ການ​ລົງທຶນ, ບົດ​ລາຍ​ງານ​ຂອງ​ກະຊວງ​ການ​ເງິນ ກ່ຽວ​ກັບ​ການຈັດ​ຕັ້ງ​ປະຕິບັດ​ແຜນ​ພັດທະນາ​ເສດຖະກິດ-ສັງຄົມ, ​ບົດ​ລາຍ​ງານ​ຂອງ​ກະຊວງ​ການ​ເງິນງົບປະມານ​ແຫ່ງ​ລັດ ​ແລະ ຂອງ​ທະນາຄານ​ແຫ່ງ ສປປ ລາວ ກັບ​ສະພາບ​ການ​ພົ້ນ​ເດັ່ນ​ໃນ​ການຈັດ​ຕັ້ງ​ປະຕິບັດ​ແຜນ​​ເງິນຕາ​, ບົດ​ລາຍງານ​ກ່ຽວ​ກັບ​ການຈັດ​ສັນ 3 ປ່າ: ປ່າ​ປ້ອງ​ກັນ, ປ່າ​ສະຫງວນ ​ແລະ ປ່າ​ຜະລິດ.

   ບົດ​ລາຍ​ງານ​ຂອງ​ອົງການ​ໄອ​ຍະ​ການ​ປະຊາຊົນ​ສູງ​ສຸດ ​ແລະ ສານ​ປະຊາຊົນ​ສູງ​ສຸດ ​ແລະ ສະພາ​ແຫ່ງ​ຊາດ​ກ່ຽວກັບ​ການ​ເຄື່ອນ​ໄຫວ​ສົກ​ປີ 2013-2014 ​ແລະ ​ແຜນ​ງານ​ການ​ເຄື່ອນ​ໄຫວ​ວຽກ​ງານ ສົກ​ປີ 2014-2015.

   ຫຼັງ​ຈາກ​ນັ້ນ ກໍ​ຈະ​ມີ​ການ​ປະ​ກອບ​ຄຳ​ຄິດ​ຄຳ​ເຫັນ​ຕໍ່​ເນື້ອ​ໃນ​ບົດ​ລາຍງານ​ຕ່າງໆ​ຂອງ​ຄະນະ​ປະຈຳ​ສະພາ​ແຫ່ງ​ຊາດ, ອົງການ​ກວດ​ສອບ​ແຫ່ງ​ລັດ,​ ຜູ້ ຕາງໜ້າອົງການ​ຈັດ​ຕັ້ງ​ມະຫາຊົນຂັ້ນ​ສູນ​ກາງ ​ແລະ ວາລະ​ຕອບ​ຄຳ​ຊັກ​ຖາມ​ຂອງ​ບັນດາ​ກະ​ຊວງກ່ຽວ​ຂ້ອງ ​ແລະ ຮັບຮອງ​ເອົາ​ມະຕິ​ຂອງ​ກອງ​ປະຊຸມ​ສະ​ພາ ຂະນະ​ທີ່ ທ່ານ ດຣ. ອຸ່ນ​ແກ້ວ ວຸດ​ທິລາດ ລະບຸ​ຕື່ມ​ວ່າ: ຍັງ​ຈະ​ມີ​ການ​ພິຈາລະນາ​ຮ່າງ​ກົດໝາຍ​ຈຳນວນ 5 ສະບັບ ​ໃນ​ນັ້ນ ປະກອບ​ມີ​ກົດໝາຍ​ປັບປຸງ​ຈຳນວນ 3 ສະບັບ​ຄື ກົດໝາຍ​ວ່າ​ດ້ວຍ​ອາກອນ​ມູນ​ຄ່າ​ເພີ່ມ, ​ມາດຕະຖານ, ​ແກ້​ໄຂຄຳ​ຮ້ອງທຸກ ​ແລະ ອີກ 2 ສະບັບ ​ແມ່ນ​ກົດໝາຍສ້າງ​ໃໝ່​ຄື​ກົດໝາຍ ວ່າ​ດ້ວຍ   ການ​ຕ້ານ ​ແລະ ສະກັດ​ກັ້ນ​ການ​ຟອກ​ເງິນ ​ແລະ ການ​ສະໜອງ​ທຶນ​ໃຫ້​ແກ່​ການ​ກໍ​່ການ​ຮ້າຍ ​ແລະ ກົດໝາຍ​ ວ່າ​ດ້ວຍ​ການກວດ​ສອບ​ເອກະລາດ.

ຫົວໜ້າ​ຫ້ອງ​ວ່າການ​ສະ​ພາ​ແຫ່ງ​ຊາດ​​ແຈ້ງ​ຕື່ມ​ວ່າ: ​ໃນ​ໄລຍະ​ດຳ​ເນີນ​ກອງ​ປະຊຸມ​ປະຊາຊົນ​ສາມາດ​ສົ່ງ​ຄຳ​ຄິດ​ຄຳ​ເຫັນ ​ແລະ ຄຳ​ສະ​ເໜີ​ໄປ​ຍັງ​ກອງ​ປະຊຸມ ​ໂດຍ​ບໍ່​ຕ້ອງ​ເສຍ​ຄ່າ​ໃດໆ​ຜ່ານ​ໝາຍ​ເລກ​ໂທລະສັບ 156, ​ໂທລະ​ສານ 021 452627, ຈົດໝາຍ​ໄປສະນີ​ຕູ້​ປນ 662 ຫຼື ຈະ​ສົ່ງ​ທາງ​ອີ​ເມລກໍ​ໄດ້​ທີ່ na_session@na.gov.la

Related items